ILOILO CITY – Nagdangat na sa 71 ang na-record nga kaso sang monkeypox sa United Kingdom.
Ini matapos man nga na-record ang dugang nga 14 ka mga bag-o nga kaso.
Suno kay Bombo International Correspondent Ramil Isogon, ang 70 ang nagikan sa England samtang ang isa ang nagikan sa Scotland.
Apisar sang nagdugang nga kaso, manubo sa gihapon ang risgo sa katawhan suno sa UK Health Security Agency (UKHSA).
Sa amo nga mga kaso, ma-obserbahan nga nagaka-infect ang mga tawo nga na-identify nga bisexual ukon ang mga lalaki nga nagapakighilawas sa kaangay nga lalaki.
Nagpanugyan naman ang health department nga ang may mga indi kinaandan nga rashes ang dapat nga magpakig-angot sa gilayon sa NHS 111 ukon sa ila local sexual health service.
Ginrekomendar sang UKHSA sa tanan nga naka-close contact sang mga nagpositibo sa monkeypox nga mag-isolate sang 21 ka adlaw.
Ini ang ginalakipan sang pagpa-iway sang travel, paghatag sang contact details para sa contract tracing kag likawan man ang direct contact sa mga tawo nga immunosuppressed, nagabusong kag kabataan nga naga-edad sang 12 anyos kag panubo.
Gina-abisuhan man ang publiko nga mag-avail sang smallpox vaccine.
