ILOILO CITY – Ginabanta nga magalab-ot sa P5.268 trillion ang mangin full-year budget sa administrasyon ni presumptive president Ferdinand “Bongbong” Marcos Jr. sa tuig 2023.
Ini ang gin-anunsiyo ni Department of Budget and Management (DBM) officer-in-charge Tina Rose Marie Canda pagkatapos sang 181st meeting sang inter-agency Development Budget Coordination Committee (DBCC) nga ginabug-usan sang economic managers sang pungsod.
Ang gina-propose nga budget sa masunod nga tuig ang equivalent sa 22.1% nga gross domestic product sang pungsod suno kay Canda sang ginbasa ang joint statement sang DBCC.
Ang gin-aprubahan nga budget ceiling sang economic managers ang mas mataas sa P5.242-trillion nga ginpanan-aw sang economic team sang December 2021.
Ang DBCC ang ginabug-usan sang mga tiglikom sang Socioeconomic Planning, Finance (DOF), Budget and Management (DBM) kag subong man gobernador sang Bangko Sentral ng Pilipinas (BSP).
Suno kay Canda, gin-set sang economic team ang P5.268-trillion cap para sa 2023 national budget bangud sang mataas nga projected revenue collections sa masunod nga tuig nga magalab-ot sa P3.633 trillion ukon 15.3% sang GDP.
Ginapanan-aw man sang economic team nga ang disbursements sa masunod nga tuig ang magalab-ot sa P5.086 trillion ukon 21.3% sang GDP.
Na-maintain man sang DBCC ang target fiscal deficit sa 6.1% sang ekonomiya sang 2023.
Suno pa kay Canda, ang incoming administration ang dapat nga mag-stick sa P5.268-trillion budget ceiling para sa prudent fiscal management.
Suno naman kay Marcos Jr., plano niya nga punduhan ang ano man nga economic stimulus measure bangud sang nagapadayon nga COVID-19 pandemic gamit ang national budget sa 2023.
