Sa Estados Unidos, wala naka-saler sa isa ka Pinoy martial arts expert ang isa ka Amerikano nga nagapinagusto lang sa pagpang-kastigo sa mga tawo nga iya makit-an sa New York City.
Ginapahayag nga nakapangsakit na ang lalaki nga si Samuel Frazier sa anum ka mga tawo antes naagyan kag nasampolan ni Ro Malabanan, isa ka Filipino-American jiu-jitsu black belter.
Suno kay Malabanan, nakit-an mismo niya nga gulpi lang nga nagtuhaw si Samuel kag gulpi lang nga nanumbag sa lalaki sa amo nga lugar.
Bilang black-belter sa jiu jitsu, ginpahayag ni Malabanan nga nagtukar gid ang iya nga instinct bilang martial artist rason nga wala na ini nangduha-duha kag ginpalapitan ang lalaki.
Gin-atake siya ni Malabanan sa iya nga likod. Nagtinguha pa nga magbato ang lalaki apang gingamit ni Malabanan ang seatbelt position kag ginduot ang lalaki sa semento.
Gin-check man ni Malabanan kun may dala nga armas ukon patalom ang lalaki kag ginpadayon ang pagduot sini sa semento tubtub nga makaabot ang pulis.
Isa ka mixed-martial arts practitioner si Malabanan nga nagatudlo man sang boxing. Ginbun-ag siya sa Pilipinas apang nagdaku sa Estados Unidos.
Ginpahayag man sini nga wala niya ginatan-aw ang iya kaugalingon bilang baganihan bangud ginhimo lang niya ang iya trabaho bilang isa ka New Yorker.
Nahibaluan man sang ulihi nga ang suspek ang may yara na nga daan sang kaso nga unprovoked assault. ##
