Siyam na tanan ka water refilling stations ang ginpasirado sang Iloilo City Government sa tunga sang nagalapta nga Acute gastroenteritis kag Cholera cases sa syudad sang Iloilo.
Subong nga adlaw, Septyembre 1, tatlo ka refilling stations ang gindagdagan sang closure order bangud wala sang business permits. Ini amo ang CDI Water Refilling Station; Agua Vendita Water Refilling Station; kag Aquabest Water Refilling Station.
Antes sini, may anum na nga daan nga ginsirado man ang syudad bangud wala nakapasar sa Water Quality Test.
Suno sa alkalde, mangin ang naga-suplay sang tubig sa Iloilo City Mayor’s Office ang indi man pasado sa nasambit nga test.
Kasunod sini, nagpapanaog man ang alkalde sang executive order nga naga-require sa tanan nga water refilling stations sa syudad nga magpaidalom sa mandatory water potability testing. Bulanan ang test sa accredited laboratories.
Ang Sanitation inspectors lamang halin sa Iloilo City Health Office ang pahanugutan nga mag-collect sang water samples para sa testing.
Tanan nga personnel sang kada water refilling station ang gina-require man nga magpanag-iya sang health card nga gina-isyu sang City Health Office. Dapat nga suksukon ini nga health cards sa business hours.
Required man ang mga personnel nga magpaidalom sa Food Handlers’ Training nga gina-conduct sang CHO. Kun may mabaton na nga Certificate of Completion, dapat ini ipaskil sa water refilling station.
As of August 31, 228 cases na ang Acute gastroenteritis sa Iloilo City kag pito ang patay. May walo man ka confirmed cases sang cholera.
Agosto 30 sang gindeklarar ang outbreak sini nga food and waterborne diseases sa syudad sang Iloilo.
Buwas, Septyembre 2, ang special session sang Iloilo City Council kaangot sa rekomendasyon sang Iloilo City Disaster Risk Reduction and Management Council nga ideklarar ang state of calamity sa syudad bangud sa amo nga outbreak. ##
