Magabulig pati ang Tulong Pangkabuhayan para sa mga Disadvantaged/Displaced (TUPAD) workers sang Department of Labor and Employment (DOLE) sa pagpanglimpyo sang mga bubon sa mga barangay sa syudad sang Iloilo sa tunga sang outbreak sang cholera kag acute gastroenteritis.
Kaupod sini ang City Health Office, City Environment and Natural Resources Office (CENRO), kag City Engineer’s Office (CEO).
As of September 4, may 354 na ka kaso sang acute gastroenteritis sa Iloilo City: 191 ang naka-recover, 93 ang admitted, 61 ang nagapaayo sa ila nga puluy-an, kag siyam ang napatay.
Ang latest casualty amo ang tatlo ka tuig nga bata nga lalaki sa Zone 3, Sto. Nino Sur, Arevalo, Iloilo City.
Nagapabilin naman nga walo ang cholera cases.
Lakip pa sa tikang sang CHO amo ang water retesting sa water refilling stations kag pagtinlo kag chlorination sa mga bubon.
Yara na sa 10,855 ka mga bubon ang na-inspect kag 541 ang nabutangan na sang chlorine.
Sa 241 ka water refilling stations, 188 ang na-inspect samtang 50 ang nakit-an nga non-compliant.
Sa interview sang Bombo Radyo kay Iloilo City Mayor Jerry Trenas, iya ginpahayag nga magapanagtag man ang city government sang tubig sa mga nagakinahanglan nga mga barangay.
Una na nga ginplastar sang alkalde nga lakip sa long-term plans sang syudad amo ang pagbutang sang linya sang tubo sa mga komunidad, pagpatukod sang communal toilets, kag pagpangdakop sa layaw nga mga ido bangud sa pagsimpon sang higko sang tawo kag sang ido nga amo ang nagasulod sa mga bubon.
Sa bahin sang CHO, una naman nga ginpahayag nga i-inspect man ang water sources sa mga eskwelahan agud nga mapalayo man sa peligro ang mga kabataan nga nagabalik sa face-to-face classes.
