Wala pa napasa ang proposed Local Public Transport Route Plan (LPTRP) sang probinsya sang Iloilo sa Land Transportation Franchising and Regulatory Board (LTFRB).
Sa interview sang Bombo Radyo kay Ex-officio Board Member Ramon Sullano, chairman sang Committee on Transportation sa Iloilo Provincial Board, iya ginpahayag nga gina-finalize pa ini subong sa Provincial Planning and Development Office (PPDO).
Una na nga ginpahayag sang PPDO nga nakasugtan sa meeting sang Iloilo City Government kag Iloilo Provincial Government nga pasudlon sa syudad ang units sang jeep halin sa first towns ukon halin sa Leganes, San Miguel, Oton, kag Pavia.
Limitado lang ang numero sang pasudlon nga mga jeep, kag pag-abot naman sa syudad, may yara sang loading kag unloading areas nga ibutang ang Public Safety and Transportation Management Office (PSTMO) agud indi man maapektuhan ang city-loop jeepneys.
Suno kay Sullano, magahingyo pa ang probinsya sang legislative support gikan sa Iloilo City Council, ukon magpasar sang Resolution of No Objection sa proposed LPTRP sa probinsya agud nga makabulig nga ma-justify sa LTFRB kun ngaa kinahanglan mapasulod sa syudad ang first-town jeepneys.
Gin-athag man ni Sullano sa publiko nga aprubado na ini sa syudad kag sa probinsya IN PRINCIPLE. Subject pa ini sa approval sang LTFRB.
Antes sini, may serye man sang konsultasyon nga ginpatigayon kaupod ang lain-lain nga stakeholders, riding public, kag iban pa nga mga sektor agud indi na matabo pa ang pagsalangisag sang una nga ginpatuman ang LPTRP sa Iloilo City sang Hunyo.
