Duha na ang kumpirmado nga kaso sang cholera sa probinsya sang Iloilo.
Sa report sang Iloilo Provincial Health Office (IPHO), ang mga pasyente amo ang isa ka tuig kag siyam ka bulan nga bata sa Oton kag ang 21-anyos nga babayi sa Pavia nga naga-eskwela sa syudad sang Iloilo.
Sa interview sang Bombo Radyo kay Dr. Maria Socorro Quinon, head sang Iloilo Provincial Health Office, iya ginpahayag nga may kaso man nga taga-Lemery, Iloilo apang gin-isip sa syudad sang lloilo bangud wala gid ini nakapauli sa amo nga banwa.
Padayon man ang mga tikang sa probinsya agud matapna ini nga balatian kag indi na madugangan ang mga kaso.
Suno kay Quiñon, nasapol na ang Municipal Health Officers agud nga mahatagan sang instruction nga i-monitor ang water refilling stations sa ila nga permit kag water analysis.
Ginapa-check man ang ambulant vendors agud masiguro nga safe ang ila ginabaligya nga mga pagkaon kag ilimnon.
Nagpangayo man sang bulong ang Povincial Health Office gikan sa Department of Health, kag nagpasalig nga ipa-deliver man gilayon sa Rural Health Units kun mag-abot na ang suplay.
Yara na sa final stage ang procurement sang water testing kits kag chlorine granules agud nga mapanagtag man sa mga banwa sa probinsya.
Una naman nga ginpahayag sang Provincial Health Office nga may 13 ka suspected cases sang acute gastroenteritis sa probinsya nga ginalakipan sang anum sa Oton, tatlo sa Leganes, kag tag-isa sa Dingle, Pavia, Pototan, kag San Joaquin. ##
