Nangin madinuguon ang paghingapos sang bulan sang Septyembre 2022 sa probinsya sang Iloilo bangud sa mga aksidente sa dalanon kun sa diin yara sa 10 ang patay sa sulod lang sang isa ka semana.
Septyembre 23, patay ang apat ka mga persona matapos nga nabunggu-an sang pick-up truck ang tricycle sa Barangay Oyungan, Miagao, Iloilo.
May duha man ka menor de edad nga napilasan bangud sa amo nga insidente.
Septyembre 26, duha ang patay kag isa ang pilason matapos nakabunggo sa poste sang streetlight ang isa ka motorsiklo sa Barangay Ungka 1, Pavia, Iloilo.
Ginapahayag nga madasig ang pagpadalagan sang motor kag lunsay man wala sang suksok nga mga helmet ang mga biktima kag ginapahayag man nga nakainom sang makahulubog nga ilimnon ang mga ini sang natabo ang nasambit nga insidente.
Septyembre 28, patay man ang isa ka 62-anyos nga tigulang matapos nabungguan sang pribado nga salakyan samtang nagatabok sa karsada sa Zone 2, Barangay Botong, Oton.
Septyembre 28 man gihapon, isa ang patay kag isa ang pilason matapos nadulaan sang kontrol ang nagamaneho sang motorsiklo kag nakabunggo sa barandilya sang taytay sa Barangay Naulid, Miagao, Iloilo.
Ginapahayag nga halin sa namatyan sa Barangay Dingle, Miagao ang mga biktima kag naghagaray nga mabakal kuntani sang dugang nga ilimnon. Nakumpirma man sang pulis nga naka-inom na nga daan ang nagadala sang motor.
Septyembre 29 naman, patay ang duha ka estudyante matapos nabungguan sang isa ka wing van nga ginapahayag nadulaan sang preno sa Barangay San Juan, Barotac Viejo, Iloilo.
Lunsay 18-anyos ang mga biktima sa amo nga insidente.
Suno naman kay PSMS Francisco Lindero, Jr., spokesperson sang Iloilo Police Provincial Office, base sa Public Safety Indicator halin sang Enero tubtub Septyembre 2022, nakasaad nga nagtaas gid man ang numero sang vehicular accidents sa Iloilo ipaanggid sa nagligad nga tuig sa amo man nga period.
Subong nga tuig, halin sang Enero tubtub sang Septyembre, may yara sang 2,693 ka aksidente sa dalanon, mas mataas sa 2,341 nga narekord sang amo man nga period sang 2021.
Sa mga kaso subong nga tuig, 90 gid ang napatay kag 962 ang injured.
Lakip sa ginpangtumod nga rason amo ang pagpabaya sang mga driver kun yara sa dalan, pag-ulan ulan, madulom nga mga dalan, hubog nga mga driver, kag kun kaisa nagasalig man ang mga motorista nga maligwa ang dalan rason nga nagapagusto lang sa pag-drive.
Lakip naman sa ginalantaw nga mga tikang amo ang pag-increase sa traffic auxiliary kag ang aktibo nga pagbulig sang mga barangay tanod agud nga makabantay sa mga dalanon ilabi na kun gab-i. ##
