Ginpirmahan na ni President Ferdinand “Bongbong” Marcos Jr. ang layi agud nga mag-grant sang Philippine citizenship sa American basketball player kag Barangay Ginebra import nga si Justin Brownlee.
Ginkumpirma ini ni Senator Francis Tolentino, isa sa principal authors sang Republic Act 11937.
Halos isa ka bulan lang ang nagligad matapos nga ginpirmahan sang Senado ang House Bill 6624 sa third and final reading nga wala sang amendments sa version nga ginpasar sa Kamara.
Hungod nga ginpadasig ang pagpasar sa layi bangud ginakonsiderar si Brownlee sa lineup sang Gilas Pilipinas nga natalana nga mag-atubang sa Lebanon kag Jordan sa sixth and final window sang FIBA World Cup Asian Qualifiers sa bulan sang Pebrero.
Una naman nga ginpahayag sang Philippine Olympic Committee nga kun ma-naturalize na si Brownlee, ini ang posible magpanguna sa men’s national basketball team agud maagaw ang gold sa Southeast Asian Games nga natalana na sa Mayo 5-17 sa Cambodia.
Kumpyansa ang mga sports officials nga daku ang mabulig sang 6-foot-6 Gin Kings’ import agud mabawi ang bulawan nga medalya apisar nga mahampang man ang iban nga mga pungsod nga may yara man sang naturalized players.
Matandaan nga sang nagligad nga SEA Games, napaslawan ang Pilipinas nga makuha ang kuntani ika-14 na nga sunod-sunod nga gold medal sa basketball sa amo nga biennal meet matapos nalutos ini sa Indonesia sa skor nga 85-81.
Sa labing una nga tion halin sang 1989, silver ang nakuha sang Gilas sa baylo nga gold. ##
