Gindugang ni Iloilo Governor Arthur Defensor, Jr. ang Janiuay sa mga banwa sa probinsya sang Iloilo nga napaidalom sa Red Zone bangud sa African Swine Fever (ASF).
Sa interview sang Bombo Radyo kay Iloilo Provincial Veterenarian Dr. Darel Tabuada, iya ginpahayag nga sa pito nga nakuha nga samples sa Barangay Tolarucan kag Barangay San Pedro (Poblacion), anum gid ang nagpositibo sa amo nga balatian.
Padayon pa ang imbestigasyon sang otoridad sa sini nga new cases ilabi na bangud indi man magkaiping ining duha ka mga barangay.
Wala pa sang pinal nga data ang talatapan apang ginpahayag nga madamo na nga baboy ang nagkalamatay.
Bangud madasig nga napahibalo ang kaso sa veterinary office, sandig sa monitoring, wala pa ini naglapta sa iban nga mga barangay sa banwa.
Sa subong, yara pa lang ang Iloilo Veterinary Office sa koleksyon sang samples kag pagpakig-istorya sa municipal veterinary office, kag natalana naman nga istoryahon ang hog raisers sa masunod nga semana.
Sa rekord sang Iloilo Provincial Government, 11 na ka mga banwa ang ginpaidalom sa red zones bangod sang African Swine Fever: Oton, San Miguel, Leganes, New Lucena, Alimodian, Sta. Barbara, Mina, Barotac Nuevo, Dumangas, Banate kag Janiuay.
May African Swine Fever man nga na-rekord sa Barotac Viejo, Zarraga, kag Badiangan apang wala pa gin-deklarar nga red zone. ##
