Nagdangat sa masobra 200 ka mga pamalay ang naapektuhan sang daku nga sunog nga nagpuhag sa mga residente sa Barangay San Juan kag Barangay West Habog-habog, Molo, Iloilo City kaina sang kaagahon.
Sa inisyal nga rekord sang Iloilo City Social Welfare and Development Office (CSWDO), 172 ka balay ang apektado sa Barangay West Habog-habog samtang 62 naman sa Barangay San Juan.
Wala pa sang pinal nga rekord kun pila diri ang totally burned kag pila ang partially burned.
Sa interview sang Bombo Radyo kay Mary Grace Centino sang operations team sang CSWDO, iya ginpahayag nga yara subong ang mga biktima sa Baluarte Elementary School kag San Juan Elementary School.
May pito man ka community kitchens nga gin-mobilize sa West Habog-habog; samtang apat naman sa San Juan.
May inisyal naman nga food packs kag non-food items nga ginhatag sa mga residente.
Ang nagapanguna nga kinahanglanon subong sang mga residente amo ang mga pagkaon, tubig, panapton, kag utensils bangud kalabanan sa ila ang wala gid sang nadala sang nagtal-as sa ila mga balay kaina sang kaagahon.
PADAYON ANG IMBESTIGASYON
Suno sa Bureau of Fire Protection (BFP), padayon pa subong nga gina-imbestigaran kun ano ang ginhalinan sang tuman ka daku nga sunog nga madasig nga naglamon sa mga pamalay.
4:37 ang fire call kag gin-deklarar nga under control na ini sang 6:16 sang aga.
Sa interview sang Bombo Radyo kay Senior Fire Officer 1 Jake Ronald Solis, arson investigator, iya ginpahayag nga wala pa man subong sang ma-deklarar nga balor sang kahalitan nga ginbilin sang sunog.
Wala sang casualty kag wala sang reported nga injuries.
Ginpalibutan naman sang yellow tape ang balay ni John Robert Bantario nga amo suno sa mga residente ang inisyal nga ginhalinan sang kalayo. Gina-imbestigaran pa ang mga pahayag nga may nagkalayo nga poste kag naglatay sa balay ni Bantario kag gilayon man nga naglatom sa iban nga mga balay.
Nag-depensa man ang BFP sa reklamo sang mga residente nga mahinay ang response sang fire authorities. Paathag ni Solis, tuman ka kitid ang lugar kag ikit-ikit ang mga balay rason nga indi makalusot ang fire trucks.
Naggamit na lamang sang hose ang mga bumbero agud nga masulod ang lugar kag mapalong ang kalayo.
Naglab-ot ang fire alert sa Alert Level 4. Sa idalom sang Alert Level 4, ginapakadto na sa lugar nga nasunugan ang tanan nga available nga fire engines sa Iloilo City.
Magluwas sa fire trucks sang BFP kaina, may mga nagbulig man nga volunteer fire brigades kag mga tawo nga nagpatigayon sang bucket brigade.##
