Tubtub subong haluson pa makapati ang mga residente sa Barangay West Habog-Habog kag San Juan, Molo, Iloilo City nga sa evacuation centers sila nagakaagahan kag wala na sang puluy-an bangud sa natabo nga daku nga sunog sang Sabado sang kaagahon nga naglamon sang masobra 200 ka mga balay.
Sa interview sang Bombo Radyo kay Judie Macaya, 58, isa sa mga nag-evacuate sa Baluarte Elementary School, iya ginpahayag nga wala pa sila nakahibalo kun tubtub san-o sila sa eskwelahan.
Sang aga nga natabo ang sunog, nagapangumpra si Macaya sa Iloilo Terminal Market para sa iya lutuon nga lumpia samtang nagbaligya naman ang iya bana sang taho.
“Pagpuli namon, wala na amon balay, wala na kami lutuan. Ubos gid amon gamit,” suno kay Macaya.”Indi gid [kami ka-get-over], kay amo ni oras, nagapangape kuntani kami ni banahon kag nagapamati sa Bombo,” nagahilibion nga pahayag sini.
“Maayo lang kay ang ido ko nakabugto sa iya nga pisi kag nakapalagyo. Kabuot na [sang amon ido], wala na nagapangagat,” dugang pa sini. Magluwas sa ila nga duha kag sa ido, wala na sang bisan ano nga gamit nga nasalbar sa balay nanday Macaya.
Ginpakigbahin man sini nga bag-o lang human ang iya balay bangud nagpangutang pa siya sang P18,000 agud mapakay-o ini kag indi na mag-tulo ang atop.
“Bag-o ko lang na napakay-o. Sang petsa 10. Wala pa kami isa ka bulan nga nagaistar dira,” dugang pa sang natungdan.
Magluwas sa mga kaupod ni Macaya sa Baluarte Elementary School, may mga evacuees man sa San Juan Elementary School.
Sa record sang City Disaster Risk Reduction and Management Office (CDRRMO), 207 ka mga balay ang nagkalasunog sa West Habog-Habog, Molo kag sa sini nga numero, 204 ang totally-burned kag tatlo naman ang partially-burned.
207 ka pamilya ukon 811 ka mga indibidwal ang apektado sa sunog.
Sa San Juan, Molo naman, 85 ka mga balay ang nasunog kag sa sini nga numero, 72 ang totally-burned kag 13 ang partially-burned.
314 ka mga indibidwal ukon 91 ka mga pamilya ang apektado base sa validation sang CDRRMO. ##
