Gina-selebrar subong nga adlaw ang kapyestahan sang Our Lady of Candles ukon fiesta ni Nuestra Senora dela Candelaria, ang patrona sang Western Visayas.
May fiesta masses man nga patigayunon sa Jaro Metropolitan Cathedral.
May yara man sang traditional blessing sang mga kandila ukon perdon bangud amo ini ang ginapatihan sang mga deboto nga magaprotekta sa ila gikan sa halit, kalamidad, ukon ano man nga kamalason.
Matandaan nga ginkoronahan ni Saint John Paul II ang miraculous image sang Our Lady of Candles sa iya una nga pagbisita sa Pilipinas sang Pebrero 21, 1981. Bangud sini, amo lamang ini ang nagaisahanon nga Marian image sa Asia nga ginkoronahan sang isa ka papal saint.
Yara ini subong sa Jaro Metropolitan Cathedral nga gin-deklarar naman nga isa ka national shrine sang tion sang Feast of Our Lady of Candles sang 2012.
Ginakilala man ang Jaro Metropolitan Cathedral bilang National Shrine of Our Lady of Candles — ang labing una nga Marian Shrine nga gindeklarar sang Catholic Bishops Conference of the Philippines sa Visayas.
Sa interview sang Bombo Radyo kay Father Angelo Colada, director sang Social Communications sa Archdiocese of Jaro, iya ginpahayag nga ang tema sang kapyestahan subong nga tuig amo ang: “We pray through Nuestra Señora de la Candelaria to enlarge our heart with the Light of Jesus!”
Matandaan nga duha man ka tuig nga nangin limitado ang seleberasyon sang mga deboto bangud sa restrictions dala sang Covid-19 pandemic.
May kaangtanan diri, nagpaguwa si Iloilo City Mayor Jerry Treñas sang executive order kun sa diin nakasaad nga suspendido ang klase subong nga adlaw sang mga pribado kag pampubliko nga mga eskwelahan nga nahamtang sa Jaro district.
Lakip diri ang mga masunod:
* West Visayas State University
* Western Institute of Technologuy
* Iloilo National High School
* Iloilo Science and Technology University
