Iloilo City – Gindayaw ni Iloilo City Mayor Jerry Treñas ang aktibo nga pagresponde sang Iloilo City Police Office batok sa iligal nga droga.
Ini ang kasunod sang pagsapol sang alkalde sa Peace and Advisory Council kun sa diin, ginpakilala ang bag-o nga director sang Iloilo City Police Office nga si Police Colonel Joeresty Coronica kag kay Marvin Estoque bilang regional director sang Philippine Drug Enforcement Agency-Region VI.
Sa interview sang Bombo Radyo kay Mayor Treñas, iya ginpahayag nga nanamian siya sa padayon nga pagpangdakop sang mga durugista sa syudad.
Suno kay Treñas, kabahin sang ila gin-istoryahan amo ang pagpahamtang sang tatlo ka mga checkpoints sa kada istasyon adlaw-adlaw bilang kabahin sang police visibility nga ginhingyo sang alkalde.
Samtang, nagalaum naman si Treñas nga mangin tayuyon na ang ginapakita nga aktibo nga performance sang Iloilo City Police Office.
Nahibaluan nga ang pag-appoint kay Coronica ang mandu sang alkalde bangud napaslawan ang anay direktor sang Iloilo City Police Office nga magpakita sang manami nga resulta sa pagresponde sa mga nanuhaytuhay nga krimen sa syudad.
