Iloilo – Liwat nga ginpamatud-an sang Ilonggo ang world-class talent matapos ang back-to-back win sang Iloilo Combat Sports Martial Artists sa patag sang mixed martial arts.
Sa interview sang Bombo Radyo kay Jayson Tabuada, 21, tumandok sang Barangay Mansaya, Lapuz, Iloilo City kag myembro sang Iloilo Combat Sports Martial Arts, iya ginpahayag nga gindala nila pauli ang kampeonato sa ginpatigayon nga Philippine Encuentro Championship sa Manila.
Ang kumpetisyon ang ginpasakupan nanday Chester Andres, Rhino Casipe, Jayson Tabuada kag Guiller Amido.
Dugang diri suno kay Tabuada, nagpasakop man ang grupo sa Mixed Martial Arts competition sa Bacolod City kun sa diin, nakuha man nila ang kampyeonato.
Sa amo nga competition, nagpasakop sanday Andres, Tabuada kag Nicoyco.
Ginpahayag pa sang natungdan nga magapadayon ang training sang grupo bilang pagpanghanda sa nagahilapit nga kumpetisyon sa Marso sa Manila.
May kaangtanan diri, nagahingyo ang grupo sang bulig pinansyal bilang suporta sa mga kinahanglanon sang magatiglawas sa probinsya kag syudad sang Iloilo sa mixed martial arts sa masunod nga bulan.
Mahimo ini nga ipadala pinaagi sa Gcash sa numero nga 09297742908 -Jodeza Denila.
