Iloilo – Natalana nga mag-courtesy call si Police Colonel Ronaldo Palomo, ang masunod nga director sang Iloilo Police Provincial Office.
Ini matapos nga ginpirmahan ni Major General Robert Rodriguez, chief sang Directorate for Personnel and Records Management sang Philippine National Police ang special order nga naga-designate kay Palomo bilang director tal-os kay Police Colonel Noel Aliño.
Sa interview sang Bombo Radyo kay Police Major Mary Grace Borio, spokesperson sang Police Regional Office 6, iya ginpahayag nga kinahanglan nga mag-agi sa courtesy call si Palomo bilang kabahin sang protocol sang Philipine National Police kun sa diin hatagan sang courtesy call slip kag mga pilirmahan sini.
Suno kay Borio, sa tion nga makumpleto na ini ni Palomo, maga-release sang order si Police Brigadier General Leo Francisco agud pormal na ini nga magapungko bilang bag-o nga director sang Iloilo Police Provincial Office.
Matandaan nga mismo si Iloilo Governor Arthur “Toto” Defensor Jr. ang nagpili kay Palomo nga mangin masunod nga Iloilo Police Provincial Office Director.
Nahibaluan nga si Palomo ang graduate sang Philippine National Police Academy Class 1998 nga nagikan sa Passi City kag ulihi nga na-assign sa National Personnel Holding and Accounting Unit sang Philippine National Police headquarters sa Camp General Rafael T. Crame.
