Indi mag-upod sa transport strike ang kadam-an sa transport groups sa syudad kag probinsya sang Iloilo apisar magaumpisa na ang isa ka semana nga untat byahe sa Metro Manila subong nga adlaw.
Sa interview sang Bombo Radyo kay Mr. Raymundo Boyet Parcon, presidente sang Western Visayas Transport Cooperative, iya ginpahayag nga napahibalo na sang transport cooperative sa mga myembro nga normal sa gihapon ang operasyon sang public utility jeepneys sa Iloilo subong nga Lunes, Marso 6.
Una na nga ginpahayag ni Parcon nga suportado sang transport cooperative ang public utility vehicle (PUV) modernization program sang national government. Bangud rehistrado ang WVTC sa idalom sang Cooperative Development Authority kag sa Office of Transportation Cooperatives, ang pagpatigayon sang strike makabig nga paglapas sa regulasyon sang ahensya suno sa natungdan.
Sa bahin ni Iloilo City Mayor Jerry Treñas, ginpahayag sini nga magapadayon ang klase sang mga estudyante.
Suno pa sa alkalde, maga-monitor sang sitwasyon ang Public Safety and Transportation Management Office (PSTMO), City Admin, kag si Vice Mayor Jeffrey Ganzon agud maka-responde pananglitan may mag-untat byahe man nga transport groups.
Gina-preparar man sang city government ang apat ka modernized jeep, tatlo ka bus, kag iban pa nga mga salakyan sang syudad agud i-deploy kun kinahanglanon. ##
