Gindeklarar na ang state of calamity sa Caluya, Antique bangud sang epekto sang oil spill nga naglapta sa baybayon kasunod sang paglugdang sang motor tanker nga Princess Empress sa Naujan, Oriental Mindoro.
Pinaagi sini nga deklarasyon, mas mapadasig ang response operations sang banwa para sa mga apektado nga residente ilabi na sa Barangay Semirara, Tinogboc, Sibolo, kag Harigue nga amo ang una na gintumod sang Philippine Coast Guard (PCG) nga nakitaan na sang tagas sang langis.
Gina-monitor man ang epekto sang oil spill sa P79-million seaweed industry sa banwa nga amo ang nagahatag sang trabaho sa 99% sang 11,000 nga fisherfolks sa area.
Sa interview sang Bombo Radyo kay Remia Aparri, director sang Bureau of Fisheries and Aquatic Resources (BFAR) Region 6, iya ginpahayag nga gina-tan-aw subong kun nalab-ot na sang oil slick ang seaweed farm sa Caluya Island ang nagalapad sang 1,532 hectares.
Ang daku nga parte sang seaweed farm ang nahamtang sa Panagatan kag Sibay.
Sa subong suno sa regional director, gina-validate pa ang stages sang seaweed bangud nagatubo man ini sa bilog nga tuig.
Magluwas sa kahangawa sa halit sini sa seaweed farm, may halit man ang oil slick sa fishing activity bangud temporaryo ini nga ginpauntat sang local government unit (LGU).
Gin-abisuhan ni Aparri ang mga fisherfolk nga mag-harvest lamang sang seaweed kun yara na sa harvestable stage kag dapat man nga siguruhon ang fishing boats kag indi man mag-expose sang kaugalingon sa oil spill bangud malain ini sa ikaayong lawas. ##
