ILOILO – Ginsunod sang newly-installed Iloilo Police Provincial Office (IPPO) director ang tatlo ka marching orders ni Iloilo Governor Arthur Defensor, Jr. nga tapnaon ang iligal nga droga, illegal gambling, kag illegal fishing sa Visayan Sea.
Sa latest accomplishment report sang opisina, halin sang nagpungko si Pol. Col. Ronaldo Palomo sang Marso 4, may yara na sang 11 ka anti-illegal drug operations nga nahimo sa probinsya kun sa diin may mga high-value individuals nga nadakpan.
Sa wanted persons naman, 46 ang naaresto halin sang amo nga adlaw magluwas pa sa Most Wanted persons nga nadakpan man sang pulis sa probinsya.
Sa kampanya naman batok sa illegal gambling, may 11 na ka operasyon kun sa diin nadakpan ang 12 ka violators.
Sa kampanya naman batok sa illegal fishing, may 10 na ka mga operasyon kag 22 ka indibidwal ang nadakpan.
Sa interview sang Bombo Radyo kay Police Major Rolando Araño, spokesperson sang IPPO, iya ginpahayag nga nagpadulong man mismo ang provincial director sa provincial bantay-dagat sa Northern Iloilo sang nagligad nga semana.
Wala pa sang ginpatuman ukon instruction nga dugangan ang mga bantay sa Visayan Sea suno kay Araño, apang i-assess pa ini ni Palomo kun kinahanglan dugangan ang pwersa agud nga mapabaskog pa ang pagbantay batok sa illegal fishers. ##
