Gindumdom si former Ilonggo Senator Rodolfo Ganzon sa syudad sang Iloilo kadungan sang iya ika-101 nga kaadlawan subong nga adlaw.
Sa iya birthday, opisyal nga gin-inagurahan sang Iloilo City Government ang Senator Rodolfo T. Ganzon Freedom Park sa atubang sang Iloilo City Community College sa MH Del Pilar, Molo, Iloilo City.
Yara sa kahiwatan ang anak nga si Iloilo City Vice Mayor Jeffrey Ganzon, City Councilor Sedrey Cabaluna nga nagtiglawas kay Mayor Jerry Treñas, kag iban pa nga opisyal sa syudad.
Sa interview sang Bombo Radyo sa bise alkalde, iya ginpahayag nga nagpasar man ang Sangguniang Panlungsod sang resolution nga nagaduso sa Kongreso nga islan ang pangalan sang Molo Bypass Road sa Rodolfo T. Ganzon Avenue bilang tribute sa anay senador.
Kilala si Ganzon bilang “champion of the masses” kag naka-serbe sa senado halin sang 1963 tubtub sa 1969.
Antes nagsaka sa national government, nangin konsehal man ini sa syudad kag nangin Second District Board Member sa probinsya sang Iloilo. Apat ka beses man ini nga na-eleher bilang mayor sa syudad halin sang 1955-1959, 1959-1961, 1971-1972, kag 1988-1992.
Kilala ini nga nag-author kag nag-sponsor sang “Iloilo City Freedom Law” nga nag-restore sang constitutional right sang mga residente sa Jaro, La Paz, Molo, Arevalo, Manduriao, kag Iloilo City, proper nga makapili sang ila kaugalingon nga mayor, vice mayor kag councilors.
