ILOILO – Nagpasalig ang Iloilo Police Provincial Office nga wala sang dapat ikahadlok ang mga Ilonggo bangud preparado ang mga ini matapos nga nasapwan ang utod-utod nga parte sang lawas sang indi pa mahingadlan nga mga indibidwal sa Negros Occidental.
Matandaan nga sang Enero 25, nakit-an ang duha ka utod nga kamot sa suludlan sang ice cream sa Purok Kagaykay, Barangay 2, Bacolod City.
Sang Marso 29, nasapwan naman ang duha ka utod nga tiil nga nga nasulod sa plastic malapit sa isa ka gasoline station sa CL Montelibano Avenue, Barangay Villamonte, Bacolod City.
Abril 17 sang nasapwan ang isa ka utod nga kamot sa higad sang dalan sa Barangay Bata, Bacolod City.
Samtang, Abril 20 sang may nakit-an nga nagaka-agnas nga bangkay sa Purok Araneta, Barangay Haguimit, La Carlota City, Negros Occidental.
Sa interview sang Bombo Radyo kay Police Colonel Ronaldo Palomo, director sang Iloilo Police Provincial Office, iya ginpahayag nga wala sini ginatolerar ang kaangay nga buluhaton.
Suno kay Palomo, agud malikawan ang kaangay nga insidente sa probinsya, nakig-angot na ini sa mga force multipliers agud mapasanyog ang police visibility sa tagsa ka mga barangay.
Ginpahayag dugang sang natungdan nga mahimo mag-aligmat ang mgapumuluyo kag i-report kun may yara sang makaduluda sa palibot.
Samtang, nagpasalig si Palomo nga madasig ang pagresponde sang mga ini sa tion nga may yara sang emerhensya sa probinsya.
