Passi City PNP, nagapati nga inside job ang natabo nga pagpang-ransack sa isa ka resort

PASSI CITY – Nagpanugyan ang mga otoridad nga maglikaw sa pagdala sang mga malahalon nga gamit kun magbakasyon.

Ini ang kasunod sa natabo nga pag-ransack sa hulot sang isa ka bisita nga negosyante sa Pintados de Passi Resort sa Sablogon, Passi City.

Ang biktima amo si Rafael Agcawili, residente sang Metro Manila kag Presidente sang AESO International Trading Corporation kun sa diin nakuha sa iya ang balor P1, 916,000 nga ginabug-usan sang 400,000.00 cash, relo nga nagabalor P1.4 million, kulintas nga nagabalor 80,000.00, polseras nga nagabalor 30,000.00 kag singsing.

Sa interview sang Bombo Radyo kay Police Lieutenant Colonel Aron Palomo, officer-in-charge sang Passi City Police Station, iya ginpahayag nga makagalanyat sa mga kawatan ang mga malahalon nga gamit ilabi na ang mga alahas.

Magluwas diri suno kay Palomo, mas maayo nga magdala lang sang insakto nga kwarta agud indi makawatan.

Nahibaluan nga antes natabo ang pagpang-ransack, naghiwat pa sang victory party si Agcawili kaupod sa iya mga tinawo kasunod sang pagbukas sang iya negosyo sa Barangay Imbang Grande sa amo man nga banwa.

Sa subong, may anom na ka persons sa interest ang mga otoridad.