ILOILO CITY – Ginalantaw sang National Grid Corporation of the Philippines ang liwat nga system disturbance nga rason sang total blackout sa Western Visayas.
Matandaan nga nagluntad man ang kaangay nga insidente sang Abril 27 bangud sa na-monitor nga system disturbance nga nag-apekto sa Visayas grid kun sa diin ang tanan nga units sang Panay Energy Development Corporation ang nag-auto trip.
Sa interview sang Bombo Radyo kay Mr. Reaghan Alcantara, lead specialist sang National Grid Corporation of the Philippines, iya ginpahayag nga apisar nasolusyunan na ang problema sang nagligad nga adlaw, base sa initial finding, ang blackout ang resulta sang ‘tripping’ sang generation facility.
Suno kay Alcantara, nakig-angot na ini sa mga generators kag distribution utilities agud mabalik ang linya sang kuryente sa Western Visayas.
Nahibaluan nga ang nagluntad nga total blackout ang ginakabig nga ‘unplanned outage’ sang nasambit nga transmission system operator.
