ILOILO CITY – Matapos ang tatlo ka tuig, patigayunon na ang Flores de Maria 2023 sa bulan sang Mayo.
Nahibaluan nga ini anay ang gintawag bilang Flores de Mayo, apang bangud sa epekto sang pandemya, kinahanglan sang simbahan nga bag-uhon ang pila ka mga tradisyon.
Sa interview sang Bombo Radyo kay Father Angelo Colada, director sang Commission on Social Communications sang Archdiocese of Jaro, iya ginpahayag nga aprubado ni Archbishop Most Reverend Jose Romeo Lazo ang duha ka mga approaches agud magpatigayon sang Flores de Maria nga amo ang masunod:
Umpisa sang Mayo 1 tubtob Mayo 30, kinahanglan nga hatagan sang konsiderasyon ang mga estudyante bangud nagapabilin sa gihapon nga school month ang Mayo.
Diri na kag hatagan ang mga estudyante sang catechetical modules kag materials para sa adlaw-adlaw nga selebrasyon sang Flores sa diin ang topiko ang nagasentro kay Birhen Maria, kredo kag mga simbahan, kag ang Historia Sagrada.
Kaangot diri, nalakip man ang panaysayon sang istorya ni Fatima umpisa sa bulan sang Mayo tubtob Oktubre sa diin mahimo magpili ang tagsa ka parokya sang mas nagakaigo nga approach sa diin patigayunon ini sa weekend ukon once a week.
Samtang, ginapreparahan naman sang Jaro Archdiocesan Commission on Catechesis and Catholic Education ang patigayunon nga Santacruzan kag Flores de Maria nga pila sa mga ritwal sang religious festivity.
