ILOILO – Nagapanawagan ang Sangguniang Bayan sang Pavia Iloilo sa Department of Public Works and Highways Region 6 sa gilayon nga paghatag sang solusyon sa drainage system kag sidewalk sa kontrobersyal nga Ungka flyover.
Ini matapos naeksperyensyahan ang pagbaha sa diin ginhimo nga kalamhutan kag karadlawan sang publiko ang sitwasyon pinaagi sa paghimo sang memes.
Sa interview sang Bombo Radyo kay Sangguniang Bayan Member Jose Maria ‘Pyt’ Trimañez, iya ginpahayag nga makapila na ini ka beses nga nagtinguna nga makig-angot sa Department of Public Works and Highways Region 6, apang wala sa gihapon sang sabat.
Sa matuod suno kay Trimañez, nagpatigayon ang banwa sang general session sang Abril 26 sa diin nagtambong si Department of Public Works and Highways Region 6 Assistant Regional Director Engineer Jose Al Fruto kag nagpasalig nga ipagwa ang resulta sa imbestigasyon sang third party consulting firm kag paghatag sang nagakaigo nga solusyon sa problema sang drainage kag sidewalk sa sulod sang isa ka semana.
Apang tubtub subong, nagapabilin nga wala sang sabat ang natungdan.
Sa pihak sang pagpaninguha sang Sangguniang Bayan pinaagi sa pagpasar sang legislations kag committee hearing, daw kaangay lang nga ginpabungol-bungolan ini sang Department of Public Works and Highways.
Sa subong, gintugyan na sang Sangguniang Bayan sang Pavia sa Kongreso ang pagpatigayon sang imbestigasyon sa kontrobersyal nga Ungka flyover.
