ILOILO CITY – Nagalaum ang Department of Education Region 6 nga mapabilin ang maayo nga performance ukon mas mangibabaw pa gid ang Western Visayas sa Palarong Pambansa 2023 sa Marikina City humalin sang Hulyo 29 tubtob Agosto 5.
Matandaan nga ang Rehiyon 6 ang nagpangatlo humalin sang 2017 tubtob 2019 nga mga edisyon sang Palarong Pambansa.
Sa interview sang Bombo Radyo kay Mr. Hernani Escullar, spokesperson sang Department of Education Region 6, iya ginpahayag nga may yara sang patigayunon nga koordinasyon sa mga winning divisions kag atleta agud masiguro nga mahatag ang ila kinahanglanon.
Pinaagi sini suno kay Escullar, mangin inspired ang mga atleta nga mag-practice kag mas panamion pa gid ang ila nga performance sa sports event nga ila gina-intrahan.
Matupa ang Palarong Pambansa sa school break bangud magatakop ang klase sa Hulyo 7 kag ang panibag-o nga school year ang maumpisa sa Agosto base sa Department of Education calendar.
Sa subong pahayag sang natungdan, nagapreparar ang Western Visayas sa pre-national games para sa team sports nga hiwaton sa Cebu sa bulan sang Hunyo kasunod sang madinalag-on nga pagpatigayon sang Western Visayas Regional Athletic Association (WVRAA) meet sa Aklan.
Ang mga sports nga hiwaton sa pre-Palaro amo ang basketball, volleyball, softball, baseball, football, futsal, kag sepak takraw base sa Department of Education Memorandum number 5 series of 2023.
Maga-compete ang Region 6 sa Regions 5, 7 kag Zamboanga Peninsula kag ang top two regional delegations amo ang maga-advance sa Palaro.
Isa ini ka estratehiya agud nga mapanubuan ang numero sang delegasyon sa idalom sang new normal amo man nga mapanubo ang oras sang hampang para sa mga team event.
