ILOILO CITY – Natukiban sang third party consultant sang kontrobersyal nga P680-million Ungka Flyover nga may yara sang pag-usmod ang pila ka haligi sang flyover bangud sa mahumok nga duta.
Bangud diri, kinahanglan ang indi magnubo sa P250 million nga budget agud mahimo ang ratification scheme kun sa diin padakuon ang haligi kag dugangan ang board piles sa ika-apat, ika-lima, kag ika-anum nga haligi sang flyover.
Una na nga ginpahayag ni Engr. Adam Abinales, Chief Executive Officer sang Abinales Associates Engineers plus Consultants nga amo ang nagpatigayon sang geotechnical investigation sa Ungka flyover, ang pagrekomendar sang pagkakas sang girders nga nakatungtong sa piers 4, 5 kag 6 agud mabutangan sang bored piles.
Sa mga piers nga ini, tuman ka apektado sang vertical displacement ang Pier 5 nga nagalapad sang 583 millimeters ukon 22.9 inches, Pier 6 sang 488 millimeters ukon 19.21 inches, kag Pier 4 sang 431 millimeters ukon 16 inches.
Samtang, ang board pile naman ang nagadalum sang 40 meters ang kada isa.
Suno kay Abinales, mahimo na nga maumpisahan ang pagkaayo sang flyover matapos sa fourth quarter sang 2024 ukon sa Dinagyang Festival 2025.
Kaangot diri, ginpahayag ni Department of Public Works and Highways Undersecretary Roberto Bernardo nga palaligban pa kun diin magahalin ang pondo nga gamiton para sa rehabilitasyon sang flyover kun sa diin magalawig sang 10 ka bulan ang pagkay-o sini.
Apang, nagpasalig man ini nga mapangitaan sang budget ang depektibo nga flyover santo sa projection nga ginplastar sang consultants.
