Gov. Arthur Defensor Jr., ginmanduan ang DPWH Reg 6 nga padasigon ang construction sang Bonfort Bridge sa Dingle, Iloilo

ILOILO – Ginmanduan ni Iloilo Governor Arthur Defensor, Jr. ang Department of Public Works and Highways Region 6 nga i-fast track ang pagkaayo sang Monfort Bridge sa banwa sang Dingle, Iloilo.

Ini agud indi na magtuga pa sang perwisyo sa mga pumuluyo sang lugar kag kaiping nga mga kabanwahanan.

Sa interview sang Bombo Radyo kay Gov. Defensor, iya ginpahayag nga dapat manduan man sang ahensya ang kontraktor nga padasigon ang pagkaayo sang taytay agud malabyan na sang mga tawo.

Septyembre sang tinalikdan nga tuig sang nag umpisa ang pagkaayo sang P60-million nga proyekto sa diin ang kontractor amo ang A.D Pendon Construction and Supply Incorporated.

Una na nga ginpahayag sang kontractor nga 59.93 percent na ang actual accomplishment sang taytay.

Abril 20 subong nga tuig kuntani ang completion date sang proyekto.

Nahibaluan nga Abril 2022 sang nautod ang Monfort Bridge nga naga-angot sa Barangay Camambugan kag Poblacion, Dingle, Iloilo bangud sa paglaslas sang Bagyo Agaton.