ILOILO – Wala gina-tolerar ni Iloilo Police Provincial Office Director Police Colonel Ronaldo Palomo ang pagpanago sang mga pasaway nga pulis agud maghimo sang iligal nga aktibidad ukon krimen.
Ini matapos nga naangot ang isa ka katapo sang kapulisan sa pagluthang sa isa ka sibilyan sa Barangay Gines Viejo, Passi City.
Ang suspek amo si Police Staff Sergeant Kenn James Leyble, 35, sang Passi City Police Station nga naka-detail sa IPPO Headquarters bilang myembro sang Provincial Special Operations Group.
Samtang ang biktima naman amo si Johan Padernal, 41, kag lunsay mga residente sang nasambit nga barangay nga sa subong amo ang yara na sa maayo nga kondisyon.
Nahibaluan nga si PSSg Leyble ang boluntaryo nga nagsungka mismo kay PCol Palomo kag gin-submit ang kaugalingon para imbestigahan.
Sa interview sang Bombo Radyo kay PCol Palomo, mangin patas ini sa paghatag sang hustisya sa diin magatindog ini nga halimbawa sa mga Ilonggo cops.
Suno kay Palomo, makit-an sa nangin tikang sang talatapan nga wala ini sang may ginadampigan nga police bangud ginpaimbestigaran gid ang pulis nga sangkot.
Ginpahayag dugang sang natungdan nga sa tion nga mapamatud-an nga gingamit sang pulis ang service firearm, magapangatubang ini sang kaso administratibo kag posible ma-discharge sa serbisyo.
Nagpasalig man si Palomo sa tanan nga magapangibabaw ang hustisya sa nasambit nga insidente.
Nagmandu man si Palomo sang patas nga imbestigasyon sa bahin sang Passi City Police Station.
