Gin-file sa Kamara ang bag-o nga hagna nga nagaduso nga ibalik ang tradisyonal nga Hunyo-Marso nga school calendar nga amo ang ginasunod sa pungsod antes ang COVID-19 pandemic.
Ang House Bill 8550 ang ginduso sang mga mamalidha gikan sa Makabayan bloc nga amo sanday ACT Teachers Partylist representative France Castro, Gabriela Partylist representative Arlene Brosas, kag Kabataan Partylist representative Raoul Manuel.
Gin-propose ini sa tuyo nga masolusyunan ang malain nga epekto sa mga estudyante kun gina-conduct ang klase sa Abril kag Mayo sa tunga sang nagatagiti nga init sa pungsod.
Suno sa mga mamalidha, ang indi maagwantahan nga init amo ang rason sang pagnubo sang attendance sa eskwelahan; samtang ang mga nagpursige naman nga maka-eskwela ang nabudlayan naman nga mag-tutok kag maghangop sang leksyon.
Matandaan nga bangud sa sini nga concern, nagpahayag ang Department of Education (DepEd) nga mahimo masuspinde sang mga eskwelahan ang face-to-face classes kag magbalik sa blended learning kaangay sang nakaandan sang kasagsagan sang pandemya.
Ini bangud may pila ka reports nga may mga estudyante nga nagkalalipong, naglalain ang pamatyag, kag naospital pa bangud sa kagin-ot. Nagdangat pa anay sa 40 degrees Celsius ang heat index ukon mas mataas pa sa pila ka areas sa Pilipinas.
Sa bag-o naman nga ginduso nga hagna, gin-propose ang temprano nga pagtakop sang klase sa school year 2023-2024 sa Mayo agud makaumpisa naman ang klase sa Hunyo para sa school year 2024-2025.
Nahibaluan nga sa subong, ginatun-an man sang DepEd ang iban nga mga proposal agud nga makabalik sa daan nga school calendar. #
