Leganes, pinakanaapektuhan sang pagbaha bangud sa mamunog nga ulan-PDRRMO

ILOILO CITY- Naglab-ot sa 286 ka mga indibidwal ang apektado sang baha sa Leganes, Iloilo bangud sa mamunog nga ulan.

Sa interview sang Bombo Radyo kay Dr. Jerry Bionat, Head sang Iloilo Provincial Disaster Risk Reduction and Management Office, iya ginpahayag nga apat ka mga barangay sa nasambit nga banwa ang may pagbaha nga ginalakipan sang Napnud, Gua-an, Nabitasan kag Guinobatan.

Wala naman sang mga evacuees nga nagapabilin sa evacuation center as of press time.

Suno kay Dr. Bionat, base sa report sang Municipal Disaster Risk Reduction and Management Office sang Leganes, nag-subside na ang tubig baha sa sulod sang balay sang mga residente apang may mga bilin pa nga tubig baha sa footwalk ukon access roads.

Dugang sang natungdan, sa iban nga mga banwa, normal na ang panahon kag yara sa normal nga lebel ang suba.

Apang sa banwa sang Leon, natiphag ang riprap sang Baguingin Bridge bangud naghumok ang duta tuga sang sunod-sunod nga pag ulan sang tinalikdan nga mga inadlaw.