ILOILO CITY- Napaslawan ang Board of Directors sang Iloilo City Government Employees Multi- Purpose Cooperative nga magpasa sang iban nga mga dokumento nga ginpangayo sang Iloilo City Council.
Sa interview sang Bombo Radyo kay Vice Mayor Jeffrey Ganzon, Chairman sang Committee of the Whole sa Iloilo City Council, iya ginpahayag nga tama na ka atrasado ang pagpasa sang mga dokumento nga ginpangayo sang konseho sa mga opisyales sang kooperatiba.
Suno kay Vice Mayor Ganzon, nagpaathag ang mga Board of Directors nga gintipon pa nila ang mga dokumento nga kinahanglanon kag indi man sila makadali-dali tandog sang mga dokumento bangud suspendido sila.
Sa iya naman progress report, nalakip sa mga conclusions kun ngaa wala napadalagan sang maayo ang kooperatiba amo ang masunod:
1.Ang Board of Directors sang Iloilo City Government Employees Multi Purpose Cooperative ang napaslawan sa pagpatuman sang insakto nga loan policies.
2.Wala sang nagakaigo nga plano sa pagsolbar sang mga past due accounts.
3.Wala nasunod ang mga pagsulundan sa Loans/Credit Accommodations sa Directors, Officers, Staff and their Related Interests (DOSRI) Accounts.
Kadungan sa pagplastar Ni Vice Mayor Ganzon sang mga conclusions sang iya committee report ang mga suhestyon ni Councilor Nava nga pagpasar sang mga Resolution nga nagamando sa City Council Secretariat sa pag-seal sang mga dokumento nga nagaunod sang pangalan sang mga nag-utang sa kooperatiba bangud sa makabig nga confidential documents ini kag napaidalom sa Data Privacy Act; kag resolution mga nagahingyo sa City Budget Office, City Accountant’s Office kag City Treasurers Office nga sukton ang mga may utang sa kooperatiba nga wala sang buhin ang ila mga sweldo.
