Kuwalipikado na sa Paris Olympics ang Pinoy boxer nga si Carlo Paalam matapos ginlutos sini ang Indian nga kasumpong nga si Sachin Siwach sa semifinal round sang ikaduha nga World Olympic Qualification Tournament sa Bangkok, Thailand.
Unanimous ang desisyon, 5-0, nga amo ang naghatag kay Paalam sang isa sa tatlo ka Olympic spots sa men’s 57kg class.
Indi man nangin mahapos para sa nasambit nga Tokyo silver medalist nga makuha ini nga kadalag-an subong nga tuig. Kun matandaan, ginpadala man siya sang Pilipinas sa una nga qualification tournament sa Italya apang nag-atras siya sa tunga-tunga sang ila hampang ni Shukur Ovezov sang Turkmenistan bangud sa iya ginsuprer nga shoulder injury.
Si Paalam ang ikaapat nga Filipino boxer nga sigurado na nga makahampang sa Paris kun sa diin ang tatlo ka iban pa amo sanday Tokyo silver medalist Nesthy Petecio, Tokyo bronze medalist Eumir Marcial, kag si Aira Villegas.
Ang isa pa ka Filipino boxer nga si Hergie Bacyadan ang nagakinahanglan sang isa na lang ka daog sa women’s 75kg class agud nga maka-qualify man sa Summer Games.
Ang iban pa nga mga Pilipino nga magatiglawas sa Pilipinas sa Paris amo sanday: pole vaulter EJ Obiena; fencer Samantha Catantan; gymnasts Carlos Yulo, Aleah Finnegan, Emma Malabuyo, kag Levi Ruivivar; rower Joanie Delgaco; kag weightlifters John Ceniza, Elreen Ando, kag Vanessa Sarno.
