Gindugang sang United Nations ang Israel sa “blacklist” sang mga pungsod nga nagahimo sang pagpang-abuso kag pagpanghalit sa mga kabataan kaangay sa gyera sa Gaza.
Suno kay Israeli Ambassador to the UN Gilad Erdan, nabaton na sini ang official notification kaangot sa nangin desisyon ni UN Secretary-General Antonio Guterres.
“I responded to the shameful decision and said that our army is the most moral in the world. The only one being blacklisted is the Secretary-General who incentivizes and encourages terrorism and is motivated by hatred towards Israel,” statement ni Erdan.
Kaupod sang Israel sa sini nga lista amo ang Russia, the Democratic Republic of the Congo, Somalia, Syria kag Haiti.
Mahimo nga maggamit sang iban nga mga nasyon ini nga blacklist bilang signal nga limitahan ukon dumilian na ang pagbaligya sang armas sa mga pungsod nga naga-komiter sini nga pagpang-abuso kag pagpanghalit sa kabataan.
Gin-abi-abi naman sang Palestine ini nga desisyon sang United Nations apang ginsiling nga tuman na ka atrasado ang desisyon bangud klaro nga nagakatabo na ang genocide sa sulod sang binulan na nga gyera.
Halin sang ginsuguran ang gyera sa Gaza sang Oktubre 2023, masobra na sa 36,700 Palestinians ang napatay bangud sa pagpang-atake sang Israel bilang balos sa Hamas militants, kag lakip diri nga numero ang 15,571 ka kabataan sandig sa data sang Gaza government media office.
Photo: JEHAD ALSHRAFI (ANADOLU VIA GETTY IMAGES)
