ILOILO CITY- Opisyal na nga gindeklarar bilang persona non- grata sang local government sang Palawan sanday Rosmar Tan kag Rendon Labador.
Ang resolusyon nga ginpasa sang tanan nga myembro sang Palawan Provincial Council nga nagadeklarar sa nasambit nga social media personalities kag ang Team Malakas bilang persona non-grata sa Palawan ang gilayon nga gin-aprubahan sa first kag final reading.
Ginpahayag ni Palawan 1st District Board Member Juan Antonio Alvarez, gin-insult nanday Rosmar kag Rendon ang bug-os nga banwa sang Coron kag mga pumuluyo sini.
Nahibaluan nga nagbisita ang Team Malakas sa Coron para sa isa ka outreach activity apang gin-alegar sang staff sang opisina sang alkalde sa isa ka social media post nga ginagamit lang sang duha ang mgaa pumuluyo sang Coron para sa ila nga vlog.
Ginsundan ini sang mainit nga pagbaisay nanday Labador kag Tan batok sa staff sang mayor’s office.
Ginpahayag ni Alvarez nga apisar indi husto ang post sang staff, sa gihapon isa ini ka personal nga post kag indi official statement sang banwa.
Suno sa iya, wala nagakaigo ang reaksyon sang grupo ni Tan kag Labador.
Dugang niya, apisar naghatag sila sang bulig sa mga pumuluyo, wala sila gihapon sang kinamatarung nga insultuhon ang mga residente sang Coron.
Kahapon, nag-isyu ang grupo sang ila apology matapos ginpakita ni Councilor John Patrick Reyes sang Coron ang resolusyon nga nagadeklarar sa ila bilang persona non-grata.
