Maga-sugod na ang Department of Trade and Industry (DTI) sa Septyembre subong nga tuig sa pag-apprehend sang mga nagabaligya sang indi rehistrado nga vape products.
Suno kay Assistant Secretary Amanda Nograles sang Consumer Protection Group sang ahensya, dapat nga subong pa lang, magpa-rehistro na ang vape manufacturers kag importers bangud kun wala sang ICC applications ang produkto ukon ukon wala sang PS license ang manufacturer, ini nga produkto ang indi pagpasudlon sa Pilipinas.
Tubtub Septyembre ang ginhatag nga tyempo — buot silingon, sa amo nga bulan, dapat nabaligya na tanan ang daan nga inventory.
Sang Abril, matandaan nga nag-report ang ahensya nga naka-kumpiskar ini sang illegal vape products nga naglab-ot sa balor nga P31 million.
Sa pihak nga bahin, nagapakig-angot man ang ahensya sa local government units kag civil organizations agud nga mas mapahibalo sa publiko ang risgo nga dala sang vapes.
Kasunod ini sang na-report nga may isa ka menor de edad nga napatay bangud sa severe lung injury nga resulta sang paggamit sini sang vape sa sulod sang duha ka tuig.
