Napatay na sa edad nga 88-anyos ang legendary Hollywood actor nga si Donald Sutherland nga ang karera nag-umpisa halin sang 1970s kag naglawig tubtub sang 2020s.
Suno sa iya anak nga si Kiefer, ginbawian sang kabuhi ang iya amay sa Miami, Florida bangud sa balatian.
“With a heavy heart, I tell you that my father, Donald Sutherland, has passed away,” kabahin sang post sang actor. “I personally think [he was] one of the most important actors in the history of film. Never daunted by a role, good, bad or ugly. He loved what he did and did what he loved, and one can never ask for more than that. A life well lived.”
Kilala ang nasambit nga Canadian actor sa iya papel bilang Vernon Pinkley sa “The Dirty Dozen,” ang iconic World War II film sang 1967. Sang 1970, yara man ini sa isa pa ka matahum man nga war film nga “M.A.S.H.” kun sa diin siya ang charismatic nga si Hawkeye Pierce.
Pila ka dekada ang nagligad, mas nakilala siya sang bataon nga henerasyon sang nangin villain siya sa “Hunger Games” movie franchise.
Nakasulat man ini sang memoir nga “Made Up, But Still True” nga natalana nga ipaguwa sa Nobyembre.
Apisar sang iya wala-tuo nga mga papel nga naglab-ot sa masobra 150 ka mga pelikula, wala siya na-nanominate sa Oscars apang nakabaton siya sang honorary award halin sa Academy of Motion Picture Arts and Sciences board sang 2017 kag napasidunggan sang Order of Canada.
Sang 2022, nakit-an man siya kaupod si Halle Berry kag Patrick Wilson sa space thriller nga “Moonfall” kag sa Roku TV mini series nga “Swimming with Sharks.” Ang iya final credit ang natabo sang 2023 sa Paramount+ western drama nga “Lawmen: Bass Reeves.”
(Photo: Lionsgate/Kobal/Shutterstock)
