Wala sang usikon nga tiyempo ang Filipino Olympians samtang nga yara na sa training camp sa France isa ka bulan antes ang pormal nga pagsugod sang 2024 Summer Games sa Paris.
Nagpanguna sa mga atleta nga Pilipino si Chef de Mission Jonvic Remulla kag Philippine Olympic Committee (POC) president Abraham “Bambol” Tolentino sang nag-abot na sa camp sa Metz.
Una nga nakatapak sa Paris agud magpreparar sa Olympics ang weightlifters nga sanday John Febuar Ceniza, Vanessa Sarno kag Elreen Ando, boxers nga sanday Aira Villegas, Hergie Bacyadan, Carlo Paalam kag Nesthy Petecio, kag rower nga si Joanie Delgaco.
Ginapaabot man sa masunod nga adlaw ang isa pa ka boksidor nga si Eumir Felix Marcial, fencer nga si Samantha Catantan kag gymnasts nga sanday Carlos Yulo, Emma Malabuyo, kag Levi Ruivivar.
“The athletes are excited and enthusiastic about this training camp, the main objective of which is to make sure our athletes are in top shape for the competitions,” suno kay Remulla.
Ini ang una nga tion nga nag-sulod sa training camp ang Filipino athletes nga ginapadala sa Olympiada kag ginalauman nga daku ang mabulig sini agud malampasan ang apat ka medalya nga nakuha sang pungsod sa Tokyo Olympics sang 2021.
Ang training sa Metz ang magalawig tubtub sa Hulyo 22. Lakip sa features sang camp amo ang gyms, sports labs, medical facilities, kag kitchens.
“It’s all systems go here at La Moselle and the morale of the team is very high,”pahayag naman ni Tolentino, “The first batch of athletes that flew in with us here last Saturday morning are amazed with the facility and are eager to wind up their training for their respective events for the Olympics.”#
