Ginakonsiderar sang Department of Health (DOH) nga dumilian ang “mukbang” ukon ang vlogs kun sa diin tuman ka damo nga pagkaon ang ginhanda kag ginakaon sang content creator samtang nga nagapakig-istorya ini sa viewers.
Kasunod ini sa natabo sa Iligan kun sa diin napatay gid ang vlogger nga si Dongz Apatan sang Hunyo 13 bangud sa stroke. Si Apatan ang kilala sa iya mukbang videos.
Nagpaguwa naman sang public health warning si Health Secretary Teddy Herbosa batok sa sini nga mukbang videos kag ginduso man ang mga regulasyon.
Suno kay Herbosa, indi ini maayo bangud nagahimo sang content ang isa ka tawo paagi sa sobra-sobra nga pagkaon ukon overeating — bagay nga indi healthy kag masami nga naga-resulta sa obesity. Ang obesity naman, dugang pa sang tiglikom, ang nagatuga sang hypertension, heart conditions, non-communicable diseases, kag heart attacks.
Pahayag pa ni Herbosa, indi lang content creator ang maka-atubang sang risgo bangud santo sa pagtuon, ang sige-sige nga paglantaw sang kaangay sini nga videos ang mag-resulta man sa eating disorders ukon internet addiction.
Mahimo suno sa tiglikom nga mag-isyu ang DOH sang ban sa kaangay sini nga videos kun mapamatud-an nga ang kamatayon ni Apatan ang direkta nga naangot sa mukbang ukon sa sobra-sobra nga pagkaon.
“You are promoting unhealthy behavior to the Filipinos….I can ban it locally. I can propose banning mukbang locally. Even ask the DICT to stop those sites. [It’s like] food pornography. It’s asking, making people eat like gluttons. You can earn income as long as it does not produce health risks. If you’re earning from something that is a public health threat, I will have to stop you,” pahayag sini.
Ang video streaming platform nga YouTube ang una naman nagpahayag nga istrikto sini nga gina-monitor ang kaangay nga content ilabi na ang videos nga naangot sa eating disorders.#
(Photo: Dongz Apatan/FB)
