Nagpalapit na sa National Bureau of Investigation (NBI) agud nga magpangayo sang bulig ang pamilya sang missing Mutya ng Pilipinas Pampanga contestant nga si Geneva Lopez kag Israeli fiancé sini nga si Yitshak Cohen.
Matandaan nga Hunyo 21 pa sang ulihi nga nakit-an sanday Lopez kag Cohen.
Halin sila sa Angeles City, Pampanga, kag nagbyahe pakadto sa Tarlac bangud may lantawon nga duta. Pagkaaga, nakit-an ang ila sunog nga salakyan sa kilid sang dalan sa Capas, apang ang makatilingala, wala sila nga duha sa sulod kag wala sang ihibalo ang pamilya kun sa diin na ang ila lokasyon.
May isa pa ka abandonado nga salakyan nga nakit-an naman sa Tarlac City kag ginadudahan nga may kaangtanan sa pagkadula sang mag-nobya.
Sandig sa gin-report sang utod ni Cohen kag utod ni Geneva sa NBI headquarters, wala sang namensyonar si Cohen nga may nagapamahog sa iya kabuhi.
Nagpasalamat man ang pamilya sa law enforcers sa Pilipinas bangud sa inisyatibo nga padayunon ang pagpangita sa magkarelasyon.
Sa pihak nga bahin, naghatag naman sang sworn statement ang real estate consultant nga si “Brandon” nga amo ang gina-alegar nga katapusan nga tawo nga gintabo sang duha. Ginpanginwala sini nga nagapanago siya, ginpanindugan nga professional ang iya relasyon kanday Geneva kag Cohen, kag nagpasugot man ini sa polygraph test agud mapamatud-an nga wala siya nagabutig.
Una na nga ginkumpirma sang Philippine National Police (PNP) nga pito ang ila persons of interest sa sini nga kaso lakip ang isa ka pulis nga middleman man sang couple sa ila kuntani baklon nga duta.
Tatlo ka motibo ang ginalantaw sang otoridad apang wala pa sang ginsapubliko kun ano ini nga mga anggulo.
Naglab-ot naman subong sa P1.4-million ang reward money para makahatag sang impormasyon kaangot sa nahamtangan sang duha.
Naghalin ang P1-million kanday Pampanga Governor Dennis Pineda kag Vice-Governor Lilia Pineda; P150,000 halin kay Sto.Tomas, Pampanga Mayor Johnny Sambo; P250,000 halin sa pamilya ni Cohen; kag P100,000 halin kay Angeles City Mayor Carmelo “Pogi” Lazatin Jr.
