Nabuhi kag nadugangan pa ang military activities sang China sa teritoryo sang Taiwan partikular na ang combat patrol.
Sang Martes, matandaan nga ginsakyan sang Chinese officials kag ginkumpiska ang isa ka Taiwanese fishing boat bangud sa gin-alegar nga iligal sini nga paglayag sa dagat sang Beijing — hitabo nga gintawag sang senior Taiwan official nga akto sang psychological warfare.
Magluwas diri, gin-report man sang defense ministry nga halin 7:00 kahapon, na-detect sini ang 26 Chinese military aircraft lakip ang J-16 fighters nga nagahimo sang “joint combat readiness patrol” kaupod sa Chinese warships.
Ini nga aircraft sang China ang naglupad sa airspace pa-naaminhan, sentro, kag nabagatnan nga bahin sang Taiwan.
Halin sang nagsugod ang Hulyo, nagdangat na sa 127 ka Chinese military aircraft ang nag-operate malapit sa Taiwan suno pa sa defense ministry.
Una na nga ginpahayag sang China nga ang ugat sang ila problema sa Taiwan amo ang “separatist” views sang bag-o sini nga presidente nga si Lai Ching-te.
Matandaan nga nagpatigayon pa sang war games ang China sang nagpungko sa posisyon si Lai sang Mayo.
Ginabasura ni Lai ang pag-angkon sang China sa soberanya sang Taiwan bangud ginpahayag sini nga indi ang mainland China kundi sila mismo nga mga pumuluyo sang Taipei ang maka-desisyon para sa ila buwas-damlag.#
