Nagpangibabaw sa 39 ka iban pa nga mga kandidata kag ginkoronahan bilang Binibining Pilipinas International 2024 ang kandidata sang Abra nga si Myrna Esguerra.
Ginhiwat ang koronasyon sa Araneta Coliseum kagab-i, Hulyo 7.
Magluwas nga nangin successor ni Binibining Pilipinas International 2023 Angelica Lopez, nakuha man ni Esguerra ang tatlo ka special awards nga amo ang Best in National Costume, Best in Swimsuit, kag Best in Evening Gown.
Sa pihak nga bahin, nangin Binibining Pilipinas Globe 2024 si Jasmin Bungay sang Pampanga nga amo naman ang nagbulos kay Anna Valencia Lakrini nga nangin 2nd runner-up anay sa Miss Globe 2023 pageant.
Sanday Christal dela Cruz sang Zambales kag Trisha Martinez sang Pila, Laguna ang gindeklarar naman nga 1st runner-up kag 2nd runner-up.
Ini nga koronasyon amo man ang nagmarka sa ika-60 nga tuig sang Binibining Pilipinas nga amo ang pinakamalawig na nga national pageant sa Pilipinas.
Gintambungan ini sang masobra isa ka gatos ka Binibining Queens kun sa diin nangin highlight man ang grand union sang apat sini ka produkto nga lunsay nakakuha sang Miss Universe title nga sanday Gloria Diaz (1969), Margarita Moran (1973), Pia Wurtzbach (2015), kag Catriona Gray (2018).
Nangin hosts sa programa sanday Gray, Nicole Cordoves, MJ Lastimosa, Kylie Versoza, kag Ruffa Gutierrez samtang lakip naman sa special guests si reigning Miss International 2023 Andrea Rubio.
