Magakit-anay sa Manila sa Hulyo 30 ang mataas nga diplomats kag defense officials sang Pilipinas kag Estados Unidos sang Amerika agud nga mas mapadalom pa ang alyansa sang duha ka pungsod sa tunga sang nagakatabo gihapon nga tension sa West Philippine Sea.
Suno sa Department of Foreign Affairs, sanday Secretary for Foreign Affairs Enrique Manalo kag Secretary of National Defense Gilberto Teodoro, Jr. amo ang maga-abi-abi kag makig-istorya kanday US Secretary of State Antony Blinken kag Secretary of Defense Lloyd Austin para sa 4th Philippines-US Foreign and Defense Ministerial Dialogue.
Ini nga 2+2 meeting amo ang magahatag sang dugang pa gid nga pagtamod sa defense, security, kag economic cooperation sang duha ka nasyon.
Ini ang labing-una nga tion nga patigayunon ini sa Pilipinas bangud ang nauna nga tatlo ka pagsinapol ang lunsay ginhimo sa Washington halin sang una nga ginhimo ini nga joint ministerial dialogue format sang 2012.
Ginalantaw man ang pagbisita nanday Blinken kag Austin sa Manila ang nagapakita kun ano kadaku ang suporta sang Amerika sa Pilipinas ilabi na bangud sa kumplikto sang pungsod sa China kun pagahambalan ang isyu sa West Philippine Sea partikular na sa Ayungin Shoal (Second Thomas Shoal) kag sa Bajo de Masinloc ukon sa Scarborough Shoal.
Matandaan nga sulit-sulit man nga ginalaragway sang Estados Unidos nga “ironclad” ang commitment sini nga depensahan ang Pilipinas pananglitan may yara sang armado nga pagpang-atake sa nasyon.
Ini na ang ikaduha nga byahe ni Blinken sa Pilipinas subong nga tuig samtang 2023 naman sang katapusan nga nakakadto diri si Austin.
Magluwas sa 2+2 meeting, nakatalana man nga mag-courtesy call ang duha ka opisyal kay President Ferdinand “Bongbong” Marcos, Jr. sa Malacanang.
