Ginkumpirma ni anay US President Donald Trump nga magabalik ini agud magkampanya sa Butler, Pennsylvania — ang lugar kun sa diin natabo ang assassination attempt batok sa iya sang nagligad nga Hulyo 13.
Suno kay Trump nga amo ang official candidate sang Republican Party para sa presidential elections, ini nga rally ang himuon niya bilang pagpasidungog kay Corey Comperatore nga amo ang bumbero nga napatay sang nagpangluthang ang suspek.
Wala pa sang maathag nga detalye nga ginbilin si Trump kun sa diin eksakto ang venue kag kun san-o ini patigayunon.
Base sa inisyal nga mga impormasyon, nag-abiso ang US Secret Service kag nag-desisyon naman ang Trump campaign nga patigayunon na lamang indoor ang iya nga rally bangud man sa insidente nga natabo sang ginhiwat ini outdoor sang nagligad.
Matandaan nga may minor injury si Trump sa iya dulunggan bangud suno sa iya kag sa former White House physician kag Rep. Ronny Jackson, tuga ini sang bala sang assassin.
Ginsiling naman ni Federal Bureau of Investigation Director Christopher Wray nga posible shrapnel ang rason sang pilas ni Trump apang ginkaakig ini sang mga kaalyado sang Republican presidential nominee.
Sa pihak nga bahin, sa bahin sang Democrats, ginalantaw ang vetting process ni Vice President Kamala Harris para sa iya running mate nga ginalauman nga i-anunsyo sini antes ang Agusto 7.
Si Harris nga amo ang presumptive Democratic nominee ang magahatag man sang speech sa Massachusetts fundraiser subong nga adlaw.
