𝗠𝗔𝗡𝗜𝗟𝗔 — Para sa iya boluntaryo nga pagbulig sa mga biktima sang Bagyong Carina, ginhatagan sang pasidungog ang aktor nga si Gerald Anderson sang Philippine Coast Guard (PCG) kag ginhatagn sang “search and rescue medal.”
Sa isa ka seremonya nga ginpatigayon sa headquarters sang PCG sa Port Area, Manila, ginkilala ni PCG commandant Admiral Ronnie Gil Gavan si Anderson para sa iya pagbulig nga wala nagapangayo sang bayad.
Ang medalya nga ini ginahatag sa mga indibidwal nga nagahimo sang “exemplary” nga mga buhat sa paghimakas sang search and rescue nga nagresulta sa pagpreserba sang kabuhi, kag kinahanglan nga makita ang boluntaryo nga partisipasyon bisan sa dako nga risgo kag sakripisyo sa panahon sang amo nga operasyon.
Si Anderson, nga isa ka Army reservist kag may ranggo nga Auxiliary Commander sa PCG, nag-viral sang nagligad nga bulan sang iya pagbulig sa pag-rescue sang isa ka pamilya, lakip na ang isa ka bata, nga na-stranded sa Barangay Sto. Domingo, Quezon City, tungod sa pagbaha nga dala sang Bagyong Carina.
Ini, indi amo ang una nga tion nga nag-upod si Anderson sa mga rescue operations, bangud nagbulig man siya sang panahon sang Bagyong Ondoy, nga nagdulot sang mga pagdayaw gikan sa nagkalain-lain nga grupo.
Sa pahayag, ginpunto ni PCG spokesperson Rear Admiral Armand Balilo nga si Anderson permi present sa mga relief operations kag disaster rehabilitation sang Coast Guard.
Ginpahayag man ni Balilo nga si Anderson padayon nga nagabulig sa mga Aetas sa Zambales, sa mga pamilya nga apektado sa Marawi, kag bisan nag-donate sang medical supplies kag tents sa kasagsagan sang COVID-19 pandemic.
