𝗠𝗔𝗡𝗜𝗟𝗔 —Gindugok ang una nga adlaw sang screening sang pelikula nanday Julia Barretto kag Joshua Garcia.
Ang much-anticipated reunion project amo ang “Un/Happy For You”, nga wala lamang nagpalipay sa mga fans kundi nakahimo man sang maragtas, bangud ini ang nakaganar sang makahalawathawat nga P20.5 million sa una nga adlaw sang pag-screen, Agosto 14.
Ini ang highest first-day gross para sa isa ka lokal nga pelikula sang 2024, nga nagpabakod sang iya kahimtangan bilang isa ka dapat tan-awon nga cinematic event.
Wala napunggan ang excitement samtang ang mga tumalan-aw nagdinaguso sa mga sinehan sa bug-os nga pungsod, kon sa diin ang social media napuno sang mga rave reviews, nga nagkalangkag nga makapaambit sang ila mga panghunahuna sa makawiwili nga istorya sang pelikula kag ang mabaskog nga mga leksyon nga ila nakuha gikan diri.
Samtang, bilang suporta man sa pelikula, ang iloy ni Julia, ang aktres nga si Marjorie Barretto, nag-host sang isa ka pinasahi nga block screening para sa pamilya kag mga abyan sa Power Plant Mall sa adlaw sang pagbukas. Ang nasambit nga kahiwatan puno sang mga celebrity, kaangay kay Chie Filomeno, Andrea Brillantes, Bela Padilla, Iza Calzado, kag Bianca Gonzalez.
Ang direktor sang pelikula kag aktres nga si Bela Padilla nagpaambit man sang iya pagdayaw sa lead duo sa iya X (Twitter), nga nagasiling, “Both shined because both gave each other space to shine.”
