Indi lamang si Senator Robin Padilla ang nabutang sa kontrobersiya bangud sa diskusyon sa Senado sa spousal rape kundi mangin ang asawa sini nga si Mariel Rodriguez Padilla bangud sa pag-apin sini sa iya bana nga gintawag sang iban nga “insensitive.”
Sa Facebook, may gin-share si Mariel nga picture kun sa diin nakit-an nga nagahalukanay sila ni Robin kag may caption nga “Oh may consent ‘yan ah [kiss emojis].”
Sa comments section, nagbayluhanay pa sang komento ang duha nga naga-mensyonar sang “heat” nga masami ginagamit sa pagtumod sa sexual urges.
Komento sang senador, “Hello babe. I’m in heat [fire emojis],”; kag ang sabat ni Mariel, “It’s a tie. I’m feeling hot hot hot [dancing girl emojis].”
Madamo ang na-insulto kag naugot sa amo nga post ni Mariel bangud may mga babaye nga biktima sang marital rape apang daw kaangay nga ginalahog-lahog lang ini sang mag-asawa.
Indi gid makahalam-ot suno sa netizens nga himuon nga joke ang sexual consent.
“Making fun and joking about sexual consent is so distasteful. Just, no,” pahayag sang netizen.
“Very disrespectful to all the victims of marital rape and sexual abuse within the confinement of one’s home. Disgusting. Well, what do we expect from these moronic enablers? Kawawang Pilipinas (Poor Philippines),” pahayag pa sang isa.
Nahibaluan nga sang Hwebes sang nagsentro ang Senate hearing sa consensual sex sa tunga sang kasado na nga mag-partner kun sa diin nagpamangkot si Robin nga ano ang matabo kun may mood ang bana para sa pagpakighilawas apang nagapamalibad ang asawa.
Dapat suno sa iya nga may legal nga paagi sa pag-atubang sini nga sitwasyon bangud may sexual rights ang partner sa iya partner kag labaw sa tanan suno sa iya, indi man pwede mangbabaye ang lalaki bangud lain naman ini nga kaso.
“Mayroon kang sexual rights sa asawa mo. So halimbawa, hindi mo naman pinipili ‘yung ‘in heat’. So paano ‘yun kung ayaw ng asawa mo? So wala pong ibang paraan talaga? Para ma-ano ‘yung lalaki, so paano ‘yun, mambabae ka na lang ba?” pahayag sini sa hearing sang Committee on Public Information and Mass Media.
Diri kag ginpahangop ni Atty. Lorna Kapunan, isa ka women’s and children’s rights advocate, nga kun magpangindi ang partner, dapat ini nga respetuhon sang isa bangud ang “no” nagakahulugan sang “no” bisan sa context pa sa pag-asawahay sa tunga sang asawa kag bana.
“With all due respect, hindi po obligasyon ng isang wife, sabi mo is to ‘serve the husband’. ‘Yung basis ng psychological incapacity is ‘yung mutual obligation ng mag-asawa of love and respect. Now part of love is showing your love, but kasama rin po do’n ang respect,” pahayag ni Kapunan.##
