Gintawag sang bana ni Vice President Sara Duterte nga si Manases “Mans” Carpio nga wala sang basehan, malisyoso, kag “politically-motivated” ang mga alegasyon nga involved siya sa drug smuggling partikular sa shipment sang shabu nga nagabalor sang P11-billion nga nakumpiskar sa Manila Port sang 2018.
Ini nga statement ni Carpio ang kasunod sang joint hearing sang Kamara sang nagligad nga semana kun sa diin ginpapungko bilang resource person ang anay intelligence officer sang Bureau of Customs nga si Jimmy Guban.
Si Guban ang nag-tag kanday Capio, Davao City Rep. Paolo “Polong” Duterte, kag anay presidential economic adviser Michael Yang nga amo ang nagapanag-iya sang shipment.
Suno kay Carpio, nagalaum siya nga mangin perceptive ang publiko kag mga myembro sang Kamara agud mahibaluan nga may lamod-pamulitika ang mga claim ni Guban.
“The allegations and insinuations made by Mr. Guban during the Quad Com hearing last Friday, August 16, 2024, are entirely baseless and maliciously false. The public and the esteemed members of the House of Representatives are, I trust, perceptive enough to recognize that Mr. Guban’s claims, implicating Congressman Pulong [Duterte] and myself, are unmistakably politically motivated,” pahayag sini.
Ginpaathag man sini nga bisan napangasawa sini si Sara nga halin sa pamilya sang mga pulitiko, wala gid siya nagsulod sa pulitika kag wala man nagpahilabot sa government policies.
Ginsiling sini nga isa siya ka private citizen kag abogado nga ang ginakabalak-an amo ang ikaayo sang iya pamilya kag ang proteksyon para sa kinamatarong kag interes sang iya mga kliyente.
“It has always been my personal policy and guiding principle to remain entirely separate from politics or any government-related matters. As a private citizen and a practicing lawyer, my sole concern is the welfare of my family and the diligent protection of my clients’ rights and interests,” dugang sini.
Matandaan nga si Guban ang na-indict kaangot sa koneksyon sa drug shipment kag sa una sini nga pag-atubang sa Senado sang 2018, gintum-ok sini ang police official nga si Senior Superintendent Eduardo Acierto sa pagpalusot sang P11 billion nga shabu sa Manila.
Apang sa pag-atubang sini sa Kamara sang nagligad nga semana, nagkambyo ini kag ginbulgar nga ginpahog siya nga indi pag-ihambal ang pangalan nanday Pulong, Mans, kag Yang rason nga ang pulis ang iya gintudlo sa drug shipment.
Sa statement naman sang mga lider sang House Quad Committee, ginpahayag nga wala sang pamulitika sa ila obra kag committed ang joint panel sa pagbukad sang kamatuoran base sa ebidensya. Ginpahayag man sang House leaders nga wala sang mga kahadlukan ang mga Duterte sa imbestigasyon kun matuod nga wala man sila sang may ginatago.#
