ILOILO CITY- Ginpagwa sang Department of Budget and Management (DBM) ang listahan sang masobra sa P200 billion nga balor sang priority programs kag projects nga pondohan sang excess funds sang state-run corporations.
Ini sa pihak sang kritisismo sa tikang nga i-divert ang wala nagamit nga pondo pabalik sa Treasury agud gastuhan ang mga unprogrammed appropriations.
Suno kay Budget Secretary Amenah Pangandaman, ginasunod lamang nila ang nasaad sa General Appropriations Act.
Una na ginpahayag ni Finance Secretary Ralph Recto nga ang order sang Department of Finance nga i-remit ang excess GOCC funds ang may legal nga basehan kag nagasanto lamang ini sa mando sang Congress nga nasaad sa idalom sang 2024 General Appropriations Act.
Ginpahayag naman sang Budget chief nga ang provision sa General Appropriations Act subong nga tuig nagasiling nga ang gobyerno mahimo mag-tap sang excess funds halin sa GOCCs agud pondohan ang unprogrammed appropriations.
Sang Marso, ang Finance department nag-isyu sang Circular No. 003-2024 nga naga-mando sa GOCCs, kaangay sang PhilHealth, nga mag- remit sang excess funds pabalik sa Treasury.
Bangud sa circular, natalana ang PhilHealth nga mag-remit sang P89.9 billion nga excess subsidies — P20B billion diri ang na-remit na sang first quarter kag gin-gamit agud pondohan ang masobra sa P27-billion unpaid 5.04 million claims sang COVID-19 pandemic era service allowances ukon health emergency allowances (HEA) sang frontliners.
Ang Philippine Deposit Insurance Corp. (PDIC) maga-remit naman sang P110 billion — P80 billion diri ang nasaylo na sa Treasury.
Suno kay Pangandaman, may 11 ka mga programa kag proyekto nga pondohan sang excess funds sang state-run firms nga nagabalor tanan sang P203 billion.
Ini nagalakip sang government counterpart of foreign-assisted projects balor P51.7 billion, Personnel benefits nga balor P27.6 billion, Public Health Emergency Benefits and Allowances for Health Care and Non-healthcare Workers nga balor P27.7 billion,kag madamo pa nga iban nga programa.
