Igahatag ang isa ka posthumous award sa late South Korean actor nga si Lee Sun-kyun kadungan sang Busan International Film Festival nga amo ang pinakadaku sa Asya.
Pinakakilala sang fans si Lee sa iya papel sa 2019 Oscar-winning film nga “Parasite”.
Matandaan nga hinali nga gin-anunsyo ang iya kamatayon sang Disyembre 2023 kun sa diin nagguwa nga isa ka suicide incident ang natabo sandig sa duha ka bulan nga police investigation kag gina-angot man sa paggamit sang iligal nga droga.
Ang Korea Cinema Award sa film fest ang ginahatag sa filmmakers nga nagpasaka sang status sang Korean cinema kag nag-amot sang daku para makilala ini sa bug-os nga kalibutan.
Napilian sang festival nga ihatag ini nga award kay Lee bangud nakuha sini ang buot sang domestic kag international film fans.
Sa award ceremony sa Oktubre 2, malakip man sa programa ang katapusan nga obra-maestra ni Lee nga “Land of Happiness” (2024) kun sa diin ginadala sang late actor ang papel bilang isa ka military solider kadungan sang South Korean authoritarian period sang 1970s.
Magluwas diri, may lima pa gid ka proyekto nga ipakita man sa programa kun sa diin featured man si Lee: ang 2009 film “Paju,” 2013 film “Our Sunhi,” 2014 film “A Hard Day,” 2018 drama “My Mister,” kag ang 2019 film “Parasite”.
Graduate si Lee sang prestihiyoso nga Korea National University of Arts kag isa sa pinakakilala sa South Korea nga nakabaton sang wala-tuo nga awards sa lain-lain nga mga papel sini halin sang iya debut sang 2000s.
